کيمه باخار بؤيله؟
بئيني لوت
اه يني لوت
چيلخا چيپلاق
آلاجا يوخومدا بويلاناراق
ايچيمه باخدي.
ارکک سسينده يولوخوجو بير دوغماليق
ايملي ايملر يئرينده
اؤز آديملا چاغيردي مني
اوووووووييي
مينينه مينميش سونونجو ياجوجون سونونجو تؤره سي
قولاقلاري نين بيري يورغاني بيري دؤشگي،
قاراجا ساققلاين آغارماميشکن
آغجا ديشلرين قارارماميشکن
آدينا چاپديغين او هانسي آد يوخ
بللي بيلگيل
سونونجو ياجوجون سيني بوردادير
باشينا قيلينجيني سانجاجاقسان سانج
داشينا آديني يازاجاقسان ياز
يئددينجي چاپارين يئددينجي آتي نين ناللاري دوشموش
آشيلاسي يول دئييل آديني داشلارا يازميشلارين قيلينجي نين اوجا کؤلگه سي !
" آت تيرناغيندا گليرمن
چوخداندي آشميشام گؤلگه ليکلري
آجونون آلنيندا آغاران يوللاردير آديميز.
آشدي سونونجو سيني
باشينا قيلينجيني سانجمادان،
آشدي اوجا کؤلگه ني
داشينا آديني يازمادان
يوللار تانيشيميز اولسون!
دئييب کئچدي " .
ديلي اؤز ديليمدير
آدي اؤز آديمدير
من مي سؤيله ميشم سؤيلننلري ؟
قوتلو آدي قوتلوقدور
آدينا سيغينار
آند يئري قيلينجي اولار
آت اوسته دوغار
آت اوسته اؤلر تؤره ميز اؤيرنمه ديم مي ؟
اؤيله سه قاراجا آغيني
ايچيمه آخيدان بو هانسي مندير؟
آجونون آنليندا آغارار يوللار
سس سيزجه دوشر آي ايشيغي چپرلر اوسته
قوردون اولام چاغيدير
بئش بويانين بيرلشيم دؤنه مي،
قالين آغاجي بويونجا
تانيشي يوللار اولان
آدينا سيغينان
قوتلو آدي قوتلوقدور
دوردوقجا دورار.
